Ny regissør av Kongens Ring på plass

Lagt ut
Dette blir heilt nytt for oss. Det er klart at det blir annleis, men vi trur også at det vil skape nytt liv og ny energi både i spelet og i apparatet rundt. Vi gler oss, sa styreleiar Linn Therese Sævik då ho møtte Jeff Pedersen.

I sitt 28. år får Kongens Ring ny regissør. Det er teateregissør og sverdkampinstruktør Jeff Pedersen.

Mandag kveld fikk styret og komiteleiarane i Herøyspelet Kongens Ring møte den nye regissøren. Det er Jeff Pedersen, opprinneleg frå USA, busett i Stongfjorden i Sogn og Fjordane. Der bur han saman med Idun Losnegård som er dotter til manusforfattar Rolf Losnegård.

– Eg har høyrt om Kongens Ring i tjue år, ler Pedersen, og no får eg altså sjansen til å vere regissør.

Det er ikkje det første utandørsspelet han skal prege. Han har vore regissør både for Kinnaspelet, Håkonarspelet og Dragseidspelet. Og no legg han også Herøyspelet til CV-en.

Ein snøkledd spelplass gir eit anna bilde enn slik scena er når den er staden for sommarens vakraste eventyr, men Pedersen har ikkje noko vanskar med å sjå mulegheitene, og manuset er alt gjennomdrøfta med svigerfar og manusforfattar Losnegård.

– Eg er så imponert over scena. Både fordi her er så vakkert, men også fordi eg aldri har opplevd eit sceneområdet som er så tilrettelagt for dei som er med som her. Dette er teikn på eit spel som har kontroll.

Den vinterkledde scena og Stadhavet viste seg frå si beste side då den nye regissøren, Jeff Pedersen, besøkte Herøy måndag.

Heilt unikt

Jeff Pedersen gler seg til å sette sitt preg på forteljinga om Unn, Ingolf og Karl, konge og hird, herøyfolk og herjungar.

– Her er ein generasjonskonflikt som eg ikkje har sett i noko anna spel. Det er heilt unikt, og den skal vi jobbe med. Kven eig framtida? Det er eit spennande tema som eg vil ta med inn i spelet.

Noko anna han tek med inn i spelet er kona Idun Losnegård. Ho spelte Kjerring Bråte for nokre år sidan, og styret i Kongens Ring gler seg over å få ønske henne velkomen tilbake.

Jeff Pedersen i spelhuset med manus på bordet fortel om kva planar han har for «Kongens Ring» som har vore vist kvart år sidan 1992. No, i spelet sitt 28. år er han på plass som ny regissør.

Nytt liv

Etter møtet med Jeff Pedersen seier styreleiar Linn Therese Sævik at ho er spent og optimistisk før årets spel.

– Dette blir heilt nytt for oss. Det er klart at det blir annleis, men vi trur også at det vil skape nytt liv og ny energi både i spelet og i apparatet rundt. Vi gler oss.

Takkar for seg etter 27 år

Lagt ut

Gerald Pettersen gir seg etter å ha vore regissør for Herøyspelet «Kongens Ring» i 27 år. Dermed må spelet på regissør-jakt for alle første gong i historia.

Gerald Pettersen bur i Bergen og arbeider på den Nationale Scene, men han er også fosnavågar og herøyværing og har vore med på Herøyspelet sidan før det vart eit spel. Heilt frå den første idefasen har han vore med på å prege spelet som sidan 1992 har samla over 60.000 tilskodarar til magien ved Stadhavet.

No, tretti år etter planlegginga starta og etter å ha vore regissør i 27 år og levert 108 framsyningar, takkar han for seg.

Styreleiar i «Kongens Ring», Linn Therese Sævik, ønskjer å takke Gerald Pettersen for den store innsatsen han har lagt ned i Herøyspelet gjennom alle desse åra.

– Gerald har med sin store kunnskap om teater og sin profesjonalitet pusha oss vidare, alltid på jakt etter utvikling og forbetring. Det er vemodig for oss når han no gir seg og det blir rart gå vidare utan han som har drage i trådane på det scenekunstneriske gjennom heile spelet si historie.

Freistande teater

No må spelet på regissørjakt. For aller første gong.

– Ja, det er noko vi aldri har gjort før. Men regissør skal vi finne, vi har alt starta på den jobben, og spel skal det bli, som alltid første helga i juli. «

Ein ny regissør skal halde styr på to hundre personar på scena, barn og vaksne, profesjonelle og amatørar, kor og orkester i tillegg til å få fram historia om hovdingdottera Unn sitt opprør, sitt val mellom plikt og kjærleik, gamal og ny tru.

– Vi har den finaste scena og dei beste folka både på og rundt scena, musikken og eit manus med mulegheiter for å lage teater som rører dei som kjem, og trur dette vil freiste både ein ny regissør og stadig nye besøkande.

Nedteljing til topp teater

Lagt ut
  • Vi skal gi folk på Nordvestlandet sommarens største teateroppleving med «Kongens Ring». Og i år gler vi oss ekstra til nye opplevingar med vikingleir og kongens hagefest.

Styreleiar Linn Therese Sævik kan sjå utover utescena på øya Herøy der det no endeleg vrimlar av folk. 200 barn og vaksne, musikarar, songarar og skodespelarar er i gang med fellesøvingar og gjer klar for å spele fram dramaet rundt den vakre, men rebelske hovdingdottera Unn og kongen som seinare vart kjent som Olav den heilage, sine forsøk på å temje det opprørske øyfolket.

  • Spelet er berre magisk. Forteljinga og stemninga her ute med utsikt over det veldige Stadhavet, men også idyllen og folkelivet på den gamle handelsstaden der vi i år også byr på masse vikingaktivitetar for barn.

Elise Nærø er koma på plass i amfiet på Herøy på øving.

  • Her blir det mykje nytt, lovar ho. Det er gjort mange grep som er spennande, og så har Bjørn Holum verkeleg vore lyden av Herøyspelet. No blir det heilt annleis, og eg er spent på kva folk vil synest om det.

Bjørn Holum, som gjennom alle åra har vore ein viktig del av lydsporet til «Kongens Ring» er flytta frå rolla som forteljar til Ragnar Herøyhovding. Frå å vere i koret har han no ei av hovudrollene. Han vedgår at han har grudd seg litt.

  • Kvar skal eg stå og kvar skal eg gå og kva skal eg gjere? Men, no når vi er i gang, så kjenner eg at eg gler meg. Dette blir gøy.

Vikingaktivitetar for barn

«Kongens Ring» er mellom dei få Olavspela i landet og vert komande helg, laurdag 30. juni og søndag 1. juli, i år vist for 27. år på rad. Kvart år blir det gjort endringar og teke grep for å utvikle spelet. I år vert det også større forandringar når det gjeld aktivitetane rundt spelet. I tunet på Herøy kystmuseum er det god mat og god stemning gjennom dagen med folkeliv og matsal, men styreleiar Linn Therese Sævik fortel at denne gongen har lagt ekstra vekt på at barna skal ha det kjekt også før og etter spelet.

  • Vi har laga til vikingleir der ein mellom anna kan få lage seg vikingpung, klippe seg dokkelisefigurar av Unn og andre hovudroller i spelet, skyte med pil og boge, prøve seg på arkeologiske utgravingar, sverdleik og balansekunst på kampstokk. Vi byr på nesten tjue ulike aktivitetar og håper barna vil storkose seg.

Møtepunkt for vennegjengen

Om kvelden laurdag, rett etter andre framsyning er slutt, er det tid for «Kongens hagefest». Då inviterer «Kongens Ring» til det ein håper blir sommarens møtepunkt og høgdepunkt for vennegjengen. Det blir gourmetgrill og levande musikk.

  • Denne nyskapinga gler vi oss ekstra til. Det er frå før så god stemning på tunet og i bakhagen på Herøy gard, og når vi fyller plassen med god mat, god musikk og gode folk, så må det berre bli bra. Her kan folk senke skuldrane, rusle rundt, ta ein kikk på sunnmørsjekta – og vite at her, akkurat her, har folk frå heile Sunnmøre møttest gjennom historia. Og no skal vi skape ny historie her. Velkomne!

Hagefest på spel-laurdagen

Lagt ut

Mat på open eld og levande musikk utover kvelden. Herøyspelet inviterer til hagefest laurdag kveld.

  • Vi har lyst til at folk skal få vere lenge på Herøy og kjenne den gode stemninga, så i år prøver vi oss med ein nyskaping, fortel styreleiar Linn Therese Sævik og styremedlem Arve Voldsund.

Dei har fått Marianne og Hallbjørn Catering med på laget som grillsjefar. Marianne og Hallbjørn Tømmerbakk er godt kjende i lokalmiljøet for god mat og ikkje minst god tapas. No tek dei med seg alt dei kan om gode smakar til øya Herøy og er klare for legge ei lang rekke rettar på grillen.  Vikingribbe passar fint til ein vikingmusikal, og denne får følgje av slikt som spareribs, krydderpølse, argentiske villreker og kebabspyd.

Publikum kjøper seg armband som gjer at dei kan forsyne seg som dei vil utover kvelden. Hagefesten startar straks etter siste forestillinga på laurdag. Då blir bakhagen og etter kvart tunet rigga om, det blir 18 års aldersgrense og dermed blir råd også råd å kjøpe ulike typar drikke til maten.

Sommarens treffpunkt

I tillegg til at ein kan forsyne seg frå gourmetgrill, blir det servert levande musikk. Arve Voldsund tek med kameratgjengen, Vegard Voldsund, Yngve Sævik, Rune Sævik og Jonny Leikanger, og spelar på festen. Dei utgjer eit band som for mange er ganske ukjent – men dei har mange kjente låtar på spelelista.

  • Vi spelar pop frå stort sett heile den moderne pophistoria og håper å vere med på skape god stemning på tunet denne kvelden.

Styreleiar Linn Therese Sævik seier ho gler seg til denne laurdagskvelden og få utvida den gode spelopplevinga med ein hagefest.

  • Vi trur dette kan bli veldig bra med avslappa stemning, god mat og god musikk. Sjølvsagt er vi spente når vi gjer dette for første gong, men vi håper mange har lyst til å kome og ha det triveleg i tunet. Og kanskje kan dette bli sommarens treffpunkt og høgdepunkt for vennegjengen?

Nye roller for spel-veteranar

Lagt ut

Det er eit bra steg frå løve i Kardemomme by til bisp i Kongen Ring, men det er berre å la skjegget gro og la det stå til.

Noko skodespelarkarriere vil ikkje Joakim Eiksund skryte på seg.

  • Men eg er gift. Det er drama heile tida, flirer han.

Han kan fleipe det han vil, men han kan ikkje fleipe vekk at han har mange, mange år bak seg i Herøyspelet; i koret, som hird og som Edmund munk. Så får det heller vere at det er eit stort steg frå løve-rolla på folkehøgskulen til at han no skal ta på bispekåpa i Herøyspelet.

Bispedrakta tek han over etter Morten Gusdal. Han har trakka sine barnesko i spelet og gått frå kongeflagg, til Herøy-barn og herjung før han dei siste åra har vore bisp. Og no blir han stallar, kongen si livvakt.

  • Det blir kjekt å prøve ei fysisk tøffare rolle og få herje litt meir – slik eg gjorde som herjung.

Kristning og krig

Desse to spel-veteranane endar no med å begge vere høgre handa til kongen; bispen, kongens næraste på det andelege planet, medan stallaren starta som stallsjef og enda som hærsjef.

  • Vi er like sterke figurar og roller, men har forskjellig mål der den eine representerer kristninga og den andre krigen.

Om rollene er ulike, så har begge begynt å la skjegget gro , og på plass i Herøy Amfi kan dei også kjenne det kriblar etter å kome i gang.

Fantastisk

Morten fortel at han var med på spelet i lag med far sin. Det er ei oppleving han ønsker å gi vidare til dotter si, så i år er ho også med. Joakim har hatt alle sine fire barn med i spelet i ulike samanhengar.

  • Det er noko av det fine med Herøyspelet, miks av alle folk i alle aldrar. Det er veldig kjekt.

Og så tek dei fram musikken som noko som gjer spelet spesielt bra. Dei mange songane er noko av det dei gler seg til og ikkje minst i år med songaren Bjørn Holum som herøyhovding.

I tillegg kjem alt som skjer rundt sjølve forestillingane, det sosiale, praten og maten før og etter spelet, spenninga ved kor mange folk som kjem, gleda dugnadsånda og over folkelivet på øya er andre element dei tek fram som verdiar ved å delta i spelet.

  • Og så er spelet fantastisk. Har du sett det før, så vil du sjå det igjen, og har du ikkje sett det, så har du ikkje sett nokon ting!

Ny dirigent

Lagt ut

Øyvind Granden Berg vert dirigent for vikingmusikalen «Kongens Ring» i 2018. Der skal han svinge dirigentstokken stort kor og stort orkester med 17 musikarar i symfonisk brassbesetning.

«Kongens Ring» skil seg frå andre historiske spel med det store innslaget av levande musikk der mesteparten er skrive av Svein Møller, men med nokre nyare innslag komponert av Henning Sommerro.

Øyvind Granden Berg har tidlegare spelt fløyte i spelet. Han har vore lærar i Herøy kulturskule i mange år, og er no lærar ved musikklinja ved Volda vidaregåande skule og dirigent for Ulstein Storband og Cervix Vocales.

Herøyhovding med maks ansiennitet

Lagt ut

Bjørn Holum blir høvding og Elise Nærø får forteljar-rolla som skal seie at det hende i Herøys gamle, gamle tid.

Det blir fleire nye fjes å sjå mellom hovudrollene i årets utgave av «Kongens ring». Den største forandringa for dei som har sett spelet fleire gongar, vert kanskje at Bjørn Holum etter 27 år ikkje lenger skal ha forteljar-rolla. Han har sett i gang spelet over hundre gongar med bass-stemma som kunngjer at «det hende i Herøys gamle, gamle tid».

No kjem i staden ei djup kvinnestemme; Elise Nærø.

  • Det skal bli så kjekt å drive med skodespel igjen. Det har eg alltid elska, fortel Nærø som no er mest kjent for stemma og musikken sin.

Nærø fortel at då ho gjekk på Kongshaug Musikkgymnas, så dreiv dei også mykje med skodespel. Mellom anna spelte ho Agnes, kona til Brand i oppsetninga av det kjende Ibsen-stykket.

  • Og det med skodespel er noko eg liker så godt at eg vurderte om eg skulle gå den vegen, iallfall kombinere det med musikk i musikalar.

Og det får ho gjere no. I det som blir kalla verdas vakraste vikingmusikal, 30. juni og 1. juli.

  • Eg gler meg. Dette er noko å bryne seg på. Det er formidling som eg liker så godt. Og så gir Herøyspelet meg gåsehud. Eg er glad i dramatikk og Herøyspelet er sterke følelsar.

Herøyhovding med austlandsdialekt

Etter å ha vore forteljar kvart einaste år sidan 1992, går no Bjørn Holum over til rolla som Ragnar herøyhovding. Songaren og konserthus-sjefen får dermed ei mykje større skodespelar-rolle i spelet.

  • Eg har litt erfaring frå skodespel frå før, men om dette går bra, det får vise seg, ler han.

Holum har også tidlegare vorte utfordra til å ta andre roller i spelet, men han har vore så fornøgd med rolla som forteljar at han har takka nei. Fram til i år.

  • Men no tenkte eg kvifor ikkje? Det hadde vore interessant å prøve.

Austlendingen Holum har etter ein mannsalder på Sunnmøre ikkje tendensar til sunnmørsdialekt, og har såpass respekt for språket at lurer på om dialekten til herøyhovdingen vil by på utfordringar.

  • Men etter 30 år i området, så må eg vel ha fått med meg eitt og anna, så vi får tru det går.

Fredrik Steen som ung festarmann

Saman med desse to er det også andre frå regionen som skal ha hovudroller. Hedvig Garshol, opprinneleg frå Ulsteinvik er også i år med som Kjerring Bråte. Ein annan ulsteinvikar, Fredrik Steen, skal spele Ingolf Ynda. Steen kjenner spelet godt frå då han spelte kongen for nokre år sidan.

  • Og det er kjempekjekt å bli spurt om å vere med igjen, og eg gler meg verkeleg. Det er stor stas å vere med i eit apparat med så mykje humør og stå-på-vilje. Og så blir det ei utfordring å spele ung, uskyldig mann, smiler han.

Kongerolla skal fyllast av Eirik Risholm Velle frå Ørsta. Han var ein av dei tolv i storfilmen «Den 12. mann» og har elles vore og sjå på tv-skjermane i «Heimebane» som Jan Krister Haddal. No vert han kong Olav Tryggvason «Kongens Ring».

  • Eg hadde sett spelet for lenge sidan, og så var eg og såg det igjen i fjor og såg kor mykje som hadde skjedd. Eg hadde høyrt mykje bra om Gerald og tenkte at dette, dette må vere ein bra sommarjobb, så eg tok kontakt.

Og slik kom kongekappa på, og han kan glede seg til ein sommar med det som for han får to høgdepunkt; «Kongens Ring» og fotball-VM.

Positiv utvikling

Gerald Pettersen er den som skal halde hovudet over det heile og drage i alle skodespel-trådar. Regissøren fortel at han bevisst har leitt etter lokale krefter – og funne det. No har fem av hovudrollene i tillegg til han sjølv røter i og tilknyting til regionen.

  • Det er ei kjempepositiv utvikling som har skjedd. Då vi starta i 1992, måtte vi langt for å finne profesjonelle krefter. No finst det både folk som bur i regionen og som kjem frå Søre Sunnmøre. Det er ein styrke og svært gledeleg.

 

I hovudrollene i 2018 finn du:
Kong Olav Tryggvason: Eirik Risholm Velle
Ingolf Ynda: Fredrik Steen
Møre-Karl: Frode Bjorøy
Unn den fagre: Katrine Dale
Inga: Siren Jørgensen
Ragnar Herøyhovding: Bjørn Holum
Kjerring Bråte: Hedvig Garshol
Fe den synske: Eirik del Barco Soleglad

Påmelding til spel

Lagt ut

No er det klart for å melde seg på til dei ulike rollene på og utanfor scena av «Kongen Ring 2018.»

Kring 200 aktørar er i sving på sjølve sceneområdet, medan kring 150 personar arbeider i støttefunksjonar.
Vi oppfordrar alle som ynskjer å delta om å melde seg så raskt som mogleg. Etter 10. april startar arbeidet med å tildele dei ulike rollene.

Om du ynskjer å vere med kan du melde deg på HER

Førehandssal av billettar

Lagt ut

Herøyspelet «Kongens Ring» er eit sogespel som årleg vert framført i Herøy Kommune på Sunnmøre. Sidan musikken og songen har så framtredande roller, vert spelet med rette kalla «Vikingmusikalen i havgapet».

Framsyninga vert vist 30. juni -1. juli 2018, og sidan starten har meir enn 50 000 personar sett dramaet mellom Unn den Fagre, festarmannen hennar Ingolv Ynda og friaren Karl Mørske. Midt i dette dramaet kjem sjølvaste kong Olav Haraldsson «Heilag Olav» med sine skip og hærmenn til øya. Handlinga er basert på ei hending nemnd i Snorres kongesagaer, og framsyninga skjer på den vesle øya der kongen i 1027 heldt husting.

Spelet vert utvikla frå år til år og framsyninga har eit magisk påvirking på sitt publikum. Den omfattande produksjonen består av om lag 350 aktørar på og utanfor scena, der profesjonelle skodespelarar og musikarar innehar leiande roller saman med dyktige amatørar frå regionen. Rolf Losnegård har skrive manus og Svein Møller har komponert musikken.

Publikumsbenkene er plassert i eit naturleg amfi med ei fantastisk utsikt til havet og landskapet ikring.

Her kan du kjøpe billett:

ebillett

Gruppebillettar kan bestillast på mob. 954 56 945 eller på e-post: kongensring(a)heroyspelet.no

Gjer klart for 101. framsyning

Lagt ut

Elias Warholm, Gaute Wiik, Ole Martin Øyehol og Tommy Wiik gjer seg klar til ny spelsesong. Elias Warholm frå Herøy har lokka med hareidsdølane. – Dette må berre alle få oppleve, seier han.

Dei 300 deltakarane i «Kongens Ring» gjer no klart for nye framsyningar.

Det summar i Herøy amfi. Det er eit år sidan sist. Gjensynsgleda er stor.  Både gleda over å sjå igjen kvarandre og  vere på spelplassen igjen.

– Når eg kjem over brua til Herøy, så berre senkar roa seg,  eg kjenner det langt inn i sjela, seier Ann Margreth Slåttelid, som spelar Ravna, den eldste Herøykvinna, ho som skal ha sett det meste av elendigheit og gleder. Og gjennom ti år i rolla har ho vore med på mange av gledene i spelet.
– Og vi blir som ein einaste stor familie. Det er berre så kjekt.

Ann Margreth Slåttelid og Gerd Leikanger er galne kjerringar i spelet. – Det er berre kjekt å få vere litt gal av og til, seier dei.

Gerd Leikanger er ei anna av Herøykvinnene som har ei rolle der ho har prøvd det meste. Ho er beint fram skræmd frå vitet. Og ser ut der etter.- Det er kjekt å få vere litt gal av og til, ler dei to i ei pause under den første øvingsdagen.

Gerd Leikanger som Gråla.

Så kjekt at alle må få oppleve det

I tillegg til hundre medhjelparar er det 200 aktørane som skal i sving på scena. Desse er no i gang med å gå gjennom dei første scenene. Mykje folk skal plasserast. Noko skal dei huske frå i fjor. Noko må dei berre gløyme, for det skal skapast nye bilde og nye scener.

Rundt omkring i forskjellige flokkar finn ein fire kameratar; ein herøyværing og tre hareidsdølar. Elias Warholm har vore med i mange år. I fjor fekk han med Gaute Wiik og Tommy Wiik frå Hareid.Rundt omkring i forskjellige flokkar finn ein fire kameratar; ein herøyværing og tre hareidsdølar. Elias Warholm har vore med i mange år. I fjor fekk han med Gaute Wiik og Tommy Wiik frå Hareid.

– Eg meinte dei måtte vere med, for dette er så kjekt at det må alle få oppleve, seier Elias.

Gaute og Tommy vart med i fjor, og i år har dei fått med naboen Ole Martin Øyehol.

– Det var veldig kjekt, så han også måtte få det med seg. Det er ein fin sommarhobby, sommarleir, smiler dei.

Regissør Gerald Pettersen går laust på spelet for 26. år. Og igjen har han endringar i ermet. Med nye folk i nye roller veks det fram nye mulegheiter. Som i år når følgjesveinen til trollkjerringa er 16-år gamle Simon Voldsund som har gått gradene i spelet frå Herøyunge til unge med talerolle og no hovudrolle.

– Det opnar for at trollkjerringa kan ha lokka med seg ein ung og litt truskyldig fyr og det vil gi rollene ein ny dimensjon og ny dynamikk.

200 aktørar skal i sving på scena og det er mykje som skal øvast inn i ei hektisk øveveke frå søndag til generalprøva fredag.

Vikingmusikal

Herøyspelet «Kongens Ring» handlar om hovdingdottera Unn som er forlova med den både mora, familien og samfunnet meiner ho bør gifte seg med. Men ei vårnatt stikk ho av med opprøraren og rebellen Møre-Karl. I kampen mellom det etablerte Herøy-samfunnet og desse opprørarane der hemn er viktig, kjem kong Olav Haraldsson med sitt prat om ny tru og tilgiving. Stemningane vert forsterka av mykje musikk i det som blir kalla verdas vakraste vikingmusikal. Både kor og stort orkester er med på å gjere spelet levande.

Før og etter framsyningane er det folkeliv, matsal og aktivitetar på tunet på Herøy kystmuseum. Barna kan få prøve seg på sverdleik og prøve hjelmar og brynjer, og folk kan også ro seg ein tur med ein færing frå museet.